🙏१५ ऑगस्ट,स्वातंत्र्य दिन,आपल्या सुंदर भारत देशाचा दिवस 🙏

१५ ऑगस्ट,स्वातंत्र्य दिन,आपल्या सुंदर भारत देशाचा दिवस.आज खूप ठिकाणी देशभक्ती ची गाणी कानावर पडली.सर्वजण एकत्र येऊन हा दिवस साजरा करतात.शाळेत सुद्धा आजचा दिवस खूप सुंदर पद्धतीने साजरा केला जातो.ध्वजारोहण,राष्ट्रीय गीत,आपली प्रतिज्ञा म्हणून साजरा केला जातो.लहान मुले सुद्धा किती आनंदाने ह्यामध्ये सहभागी होतात ना.त्यांच्या डोळ्यातले ते देशप्रेम पाहून खरंच मनाला खूप आनंद होतो.खरंच लहान मुले खूप नशीबवान आहेत असे मला वाटते.परत एकदा कधी रोज राष्ट्रीय गीत  म्हणायला मिळेल हा प्रश्न पडतो.आजकाल राष्ट्रीय गीत कुठून रस्त्यावरून जाताना त्या ठिकाणी जर शाळा असेल तर ऐकायला मिळते किंवा एखादा कोणता चित्रपट बघायला गेलेले असू,तर त्या ठिकाणी चित्रपट सुरु होण्याआधी ऐकायला मिळते.आपल्या तरुण पिढीच्या सुद्धा स्वातंत्र्य दिनाबद्दल शाळेशी जोडलेल्या खरंच खूप छान,अविस्मरणीय आठवणी असतील.सकाळी लवकर उठून तयारी करून शाळेत जाणे,नंतर एकत्र जमणे आणि एका रांगेत उभे राहून प्रथम ध्वजारोहण,नंतर राष्ट्रीय गीत,नंतर प्रतिज्ञा बोलणे,आणि नंतर मग भाषण आणि शाळेत दिलेला पेढा. खरंच ह्या आठवणी खूप सुंदर आहेत.आज ह्या स्वातंत्र्य दिनाबद्दल खरंच भारतीय जवान आणि पोलीस कर्मचारी यांचे खूप मनापासून आभार.त्यांचे देशप्रेम खरंच खूप कौतुकास्पद आहे.परंतु आजचा देश आणि आधीचा देश ह्यामध्ये खूप फरक आहे.आपली प्रतिज्ञा आपण कुठेतरी विसरत चाललो आहोत असे मला वाटते.आपण कुठेही कचरा करताना,एकमेकांशी वाद-विवाद करताना एकदा आपली प्रतिज्ञा डोळ्यांसमोर आणावी.आपल्या देशासाठी वीरमरण पत्करणारे,स्वतःच्या प्राणांची आहुती देणारे,अखेरच्या श्वासापर्यंत फक्त आणि फक्त देशासाठी लढणारे आपले वीर जवान आणि पोलीस कर्मचारी यांचा चेहरा एकदा डोळ्यासमोर आणा.जसे ते देशावर प्रेम करतात,देशासाठी चे आपले कर्तव्य पार पाडतात,तस आपण करतो का? हा प्रश्न प्रत्येकाने आपल्या स्वतःला विचारला पाहिजे.१५ ऑगस्ट फक्त ह्या दिवशीच स्वातंत्र्य दिन आहे असे समजण्यापेक्षा रोजच आपल्या देशाचा दिवस आहे असे समजून आपण कृती केली पाहिजे.आजकालच्या जगात आपल्या भारत देशाची प्रतिज्ञा लक्षात ठेऊन तशा वागणुकीची खरंच खूप गरज आहे.  देशप्रेमींनो,आपला भारत देश खूप सुंदर आहे हो,फक्त त्याला आणखीन सुंदर करणे हे आपल्या सर्वांचेच कर्तव्य आहे. 🙏🙏🙏🙏